Wawangsalan Ka 1

Assalamu'alaikum.....sampurasun.......dina posting anu geus kaliwat, geus dijentrekeun dua wangunan jeung sipat tina sisindiran, nyaeta paparikan jeung rarakitan.Dina kasempetan posting ayeuna, kuring rek medar  wawangsalan, wangunan ka tilu tina sisindiran. Mudah-mudahan we aya gunana hususna keur kuring pribadi, salaku urang Sunda, umumna mah kum we ka sing saha wae nu kaparengan nyimpang ka ieu blog....yu ah...prung...tah ieu dihandap, diantarana conto-conto wawangsalan.

Abdi mah caruluk Arab, henteu tarima teh teuing=korma.

Abdi teh sok ngembang kawung, inggis teu ngarenah teuing=pengis.

Abdi teh kapiring leutik, kaisinan ku gamparan=pisin.

Abdi ti menak ka somah, gamparan mah ieu aing=umaing.

Ajad desa basa Jawa, lesuna teu aya tanding=asu

Ajag lembur Indramayu, naha bet kalangsu teuing=asu

Ajag lembur lamun engkang, enjing henteu langsung deui=anjing

Alun-alun paleuweungan, gagal temen mun teu jadi=tegal

Anak beurit dina katung, kapan enden mundut encit=buncit

Anak munding masih nysu, aduh eneng buah ati=eneng

Anu siram kokojayan, abdi pamoyokan badis=ngoyok

Angeun somah pakampungan, kajeun bedo ti kiwari=bodo

Areuy leuweung merang daun, ulah sok japilus galih=pulus

Aringgis sok nyatang bolang, kapongpongan siang wengi=lompong 

Asal hiji jadi dua, temah matak sesah ati=walimah

Awi ngora teh jaradi, temah matak jadi liwung=iwung

Aya nu dianjing cai, aya nu diheroan=sero

Aya mesin bisa ngapung, kapidara diri abdi=kapal udara

Ayeuna ge sereh tegal, engkang mah sok matak peurih=eurih

Baku sok ngalebu badag, reueus keur sareng jeung istri=areng

Balandongan ngujur jalan, sok hayang geura los indit=elos

Bale direka masjid, nya pikir bati rumanjug=tajug

Bangkong lodor meuntas jalan, titis tulis bagja awak=bayawak

Bango hejo herang jangjang, piraku engkang ka abdi=merak

Bango leutik bodas hulu, mo samar ka diri abdi=camar

Bareto ge batur pirus, juragan geuning pelekik=akik

Batuk  eungap hese damang, sae sumping bae wengi=mengi

Beas ditutuan deui, iraha atuh patepung=tipung

Bedil langit handaruan, engkang sapertos kalinglap=gelap

Bedog urang Darmaraja, kawantu abdi mah miskin=sekin

Belut sisit saba darat, kapiraray sinag wengi=oray

Bendi panjang roda opat, ulah kalah ka carita=kareta

Bentang baranang diimah, samar bisa tepung deui=damar

Bedug wedalan eropa, abdi teu asa dipuji=tanji

Beulit cinggir simpay tangan, ulah lali ka sim abdi=ali

Beunying leutik sisi cai, ari ras sok cimataan=amismata

Beusi bodas cingcin kecrik, cumah bae dipicinta=timah

Biasa ngadodol gula, abdi henteu dipaduli=gulali

Bibika tipung tarigu, ku engkang tacan kaharti=roti

Cacangkir bahana beling, masing welas lahir bathin=gelas

Cakcak gede kadal bilik, ulah dipake mokaha=toke

Careuh beureum pasawahan, nu dusun leuwih ti misti=lasun

Cariang beureum betina, nya pikir bati arewuh=

Catetan bulan jeung taun, juragan menak utami=alamenak

Cau gede ngan sasikat, taya teuing bagja diri=cau bagja

Cek lemek jawa sumuhun, hayang teh ulah kapanggih=enggih

Cukur jangkung pamuraan, kapalay siang jeung wengi=panglay

Cisusu kentel dimasak, ulah tega-tega teuing=mantega

Cucuk basa malayuna, duriat henteu laksana=duri

Dadamar di panggulingan, alim kanu kirang surti=kasur

Dagangan pangrapet surat, mun kitu abdi mah alim=lem 

Daun kasap kosok meja, tobat ulah nolas teuing=hampelasna

Daun tuhur na tangkalna,sok rus-ras kanu teu aya= kararas

Desember tangtu ditema, geulisna lir widadari=Januari

Deukeut-deukeut anak taleus, nyangkewok teu kanyahooan=tewok

Di Cikajang aya gunung, asa paturay jasmani=Cikuray

Dodol gula ditipungan, nu hina kaluli-luli=gulali

Dudukuy panjang gagangna, pikir bati ngalanglayung=payung

Dukun tukang ngemat hewan, abdi mah ku alim teuing=malim

Ekek lembut pupuntiran, tingseredet kana ati=cecendet

Enggeus ka palupuh nangtung, ayeuna geus kapimilik=bilik

Engkang teh ngajukut laut, seger mun tepung jeung nyai=ager

Gagang caruluk karadak, pantes mun rek dinyenyeri=langari

Gamparan mah sangu atah, keur menak kawuwuh sugih=gigih

Gedang atah keur lumayung, engkang mah jelema ginding=gumading

Gedong luhur panenjoan, narah keur saheulaanan=munara

Gedong ngambang di sagara, kapalang geus bela pati=kapal

Geulang leutik munggang tangan, siang wengi henteu lali=ali

Geus tangtu ngajukut laut, seueur teuing pipikiran=ager

Goreng endog rencang sangu, wayahna geus kadar diri=dadar

Gunting pameulahan jebug, kacipta salalamina=kacip

Hayam cempa lalayaran, matak teuing nyeri ati=meri

Hayam sawah dipiara, abong kanu ape diri= meri

Hayam tukung saba gunung, uyuhan teuing nya diri=puyuh

Hiris ngora deungeun sangu, abi mah kapok teh teuing=kapokan

Hui bulu rea akar, bongan sok rayungan teuing=kamayung

Imah leutik tempat ngaji, teu asa ngalanggar cegah=langgar

Imah ngambang di sagara, ulah kapalang nya bela=kapal

Indung kuar hama sirah, nu kitu ulah digugu=kutu

Insuting ngadaun tuhur, ari ras ka diri abdi=kararas

Isuk basa malayuna, tangtos abdi rek sayagi=pagi

Jagong tuhur beunang ngunun, dunungan bagea sumping=emping 

Jalaran bibit kalapa, isin da abdi mah istri=kitri

Jampana bugang dadakan, panasaran diri kuring=pasaran

Jati leutik jagong ngora, dodolog kirang utami=semi

Jawadah tutung biritna, sacara-carana=cara

Jukut jangkung pipi gunung, hate abdi panas peurih=eurih

Kacang panjang disayuran, bati ngageremet ati= gamet

Kacang panjang gegebengan, sakieu darajat kuring=jaat

Kacang jangkung leutik daun, engkang mah satria raris=hiris

Kadal gede saba darat, pareng alus bagja awak=bayawak

Kadeuleu langgir caina, kayap-keyep anu geulis=keuyeup

Kalapa babakal minyak, nu ampuh tiis raspati=cipati

Kalong leutik saba gedang, sumedot rasaning ati=cocodot

Kararas daun kalapa, teu aya nu ngabangbrangkeun=barangbang

Kasintu di sisi situ, nu hayang kawanti-wanti=hayam

Kauntun tipung katambang beas, laksana meunang ijasah=laksa

Kebon pare dicaian, siwah niat jalir jangji=sawah

Kembang biru di astana, abot pisah jeung kakasih=salasih
Kembang bodas buah bunder, ngaheruk nya pipikiran=jeruk
Kembang jambe kara beukah, kumayangyang pikir abdi=mayang
Kendang gede pakauman, dagdigdug rasaning ati=bedug
Kertas kabur kaanginan, kumalayang pipikran=langlayangan
Ketuk leutik panayagan, ka abdi mah ningnang teh teuing=bonang
Keuyeup gede saba laut, teu hade liar ti peuting=kapiting
Koja awi dihuaan, sageuy lamun teu kasorang=korang
Kokotor saluar awak, da sanes rek iri dengki=daki
Kota kuloneun Lampegan, purah-purah tunggu burni=Sukabumi
Kulit teuas tungtung ramo, baku osok nganyenyeri=kuku
Kuring teh kamenyan koneng, rumaos kawiwirangan=warirang
Kutu baju kuar sinjang, moal weleh tumarima=tuma


Cag......






(Nyutan tina Peperenian; Drs. Ahmad  Hadi, Spk.)

Salajengna Juragan

Paparikan

1.Silih asih

Aya meri dina rakit,

boboko wadaha bakatul.

Lain nyeri ku panyakit,

kabogoh direbut batur.

Baju hideung kancing tangan,

dikaput ku merang awi.

Daek soteh ngawulaan,

lamun hade rumawatna.

Carulang dipahpal kuda,

hejo deui-hejo deui.

Rek mulang samar kaduga,

nenjo deui nenjo deui.

Seungit kembang sumarsana,

bawa angin ngadalingding.

Nu laip kieu rasana,

nandang nyeri tanpa tanding.

Talingtung talina benang,

mobil beureum diguratan.

Satungtung teu acan beunang,

moal eureun disuratan.

Tangkal manjan sisi lamping,

tangkal putat kaibunan.

Hate bungah tanpa tanding,

nampi serat kikintunan.

2. Piwuruk

Baju kutud heureut pola,

dikelin teu dijalujur.

Mun teu cucud sakola,

osok loba gogodana.

Susuru opat ngajajar,

katinggang ku daun jati.

Guguru kapalang ajar,

cara kembang burung jadi.

3.Sesebred

Cau naon cau naon,

cau kulutuk di juru.

Bau noan bau naon,

bau hitut nu di juru.

Cikur jangkung jahe koneng,

lampuyang pamura beuteung.

Rarasaan jangkung koneng,

puguh mah bureuteu hideung.

Daun jarakdibeungkeutan,

dibawa ka jalan gede.

Anu harak ngadeukeutan,

hayangeun dibawa hade.

Kihiang nu meunang nuar,

disugu pikeun jualeun.

Kahayang meunang nu beunghar,

puguh mah jalma kuuleun.

Poe Saptu poe Kemis,

salasa heuleut-heuleutan.

Saha itu muril kumis,

leumpangna eundeuk-eundeukan.

(Dicutat tina Peperenian; Drs. Ahmad Hadi Spk.)

Salajengna Juragan

Rarakitan

1. Silih asih

Daek soteh ka Cinangka,

ka Cisitu mah teu purun.

Daek soteh ka manehna,

ka nu itu mah teu purun.

Hayang teuing buah muris,

teu bisa ngasakanana.

Hayang teuing kanu geulis,

teu bisa ngakalanana.

Ka mana nya nyiar kulit,

hayang seubeuh sesewiran.

Ka mana nya nyiar duit.

hayang seubeuh pelesiran.

Lain bangban lain pacing,

lain kananga kuduna.

Lain babad lain tanding,

lain kadinya kuduna.

Mihape sisir jeung minyak,

kade kaancloman leungeun.

Mihape pikir jeung niat,

kade kaangsonan deungeun.

Cau ambon dikorangan,

kanyere ka pipir-pipir.

Lalaki ambon sorangan,

awewe teu mikir-mikir.

Deungkleung dengdek,

buah kopi rarangeuyan.

Ingkeun anu dewek,

ulah pati diheureuyan.

Kapinis ulah disumpit,

tangkal muncang ngarangrangan.

Ieu nulis bade pamit,

du'akeun ti kaanggangan.

Karinding palapah kawung,

ditiup kunu paranti.

Nu ginding ulah mangpaung,

sing emut ka diri abdi.

Kaso pondok kaso panjang,

kaso ngaroyom ka jalan.

Sono mondok sono nganjang,

sono patepangdi jalan.

Kembang goyang jeung ermawar,

pacampur jeung kacapiring.

Hariwang rea kakelar,

tagiwur teu ngeunah cicing.

Lampuyang nu cocongoan,

bawaeun ka Rajagaluh.

Ku hayang nya sosonoan,

isuk mah urang pajauh.

Leuleupeutan leuleumeungan,

ngarah kekejoanana.

Deueukeutan reureujeungan,

ngarah tetenjoanana.

Majar manehnganyam samak,

neukteukan bari motongan.

Majar maneh neang anak,

ngadeukeutan popotongan.

Ngala antanan ka jami,

cau emas tengah huma.

Kahayang ulah rek lami,

geura unjukan ka rama.

Ngalantung mulungan jantung,

bari metik nagasari.

Baringung pikir mangpaung,

ati ngerik jeung rarisi.

Pucuk tiwu akar bangban,

amis mata di susukan.

Mun rek milu geura dangdan,

cimata geura susutan.

Rayagung tanggal sapuluh,

kasungka reujeung malela.

Abdi burung mun teu tulus,

kasuka da ti baheula.

Reundeu beureum reundeu hideung,

rendeu kayas solempangan.

Beuki heubeul beuki nineung,

beuki lawas kaedanan.

Samping hideung dina bilik,

kumaha nuhurkeunna.

Abdi nineung kanu balik,

kumaha nuhurkeunana.

Sayang kaak diarengan,

diasupkeun kana peti.

Hayang angkat sasarengan,

bati gegetun nya ati.

Mun teu tulus ka paseukna,

ka pcirna oge hade.

Mun teu tulus ka lanceukna,

ka adina oge hade.

2. Piwuruk

Lamun urang ka Cikole,

moal hese tumpak kahar.

Lamun urang boga gawe,

moal hese barang dahar.

Lamun urang ninun kanteh,

ulah resep make poleng.

Lamun urang leutik keneh,

ulah resep ngomong goreng

Menggeus diangir ku jeungjing,

geura ganti ku kihiyang.

Menggeus pelesir ti peuting,

geura ganti ku sambeang.

Sing getol ninun jajamu,

nu guna nguatkeun urat.

Sing getol neangan elmu,

nu guna dunya aherat.

3.Sesebred

Majar maneh cengkeh koneng,

kulit peuteuy dina nyiru.

Majar maneh lengkeh koneng,

kulit beuteung mani nambru.

Rarasaan melak cau,

teu nyaho mun melak jahe.

Rarasaan matak lucu,

teu nyaho mun matak rehe.

Sok hayang nyaba ka Bandung,

sok hayang nyaho nanjakna.

Sok hayang nanya nu pundung,

sok hayang nyaho nyentakna.

(Dicutat tina Peperenian;  Drs. Ahmad Hadi Spk)

Salajengna Juragan

Harti jeung Wangunan Sisindiran

Kecap “sisindiran” ari asalna mah tina kecap “sindir”, anu maksudna “sisi”.Ngomong ku sindir maksudna ngomong anu “nyisi”, henteu poksang ceplak pahang, pikeun ngaragangan anu diajak nyarita, supaya omongan urang anu karasana henteu nyentug atawa ngasruk kana hatena.

Ari “sindir sampir”, beunang dihartikeun “moyok ku jalan anu malibir”. Upamana ngomong dua, meupueh lemes jeung ngomong seukeut.

Sanajan kecapna asal tina “sindir”, ari buktina mah jauh pisan jeung asalna. Sisindiran mah kecap istilah pikeun hiji rupa kabinangkitan Sunda anu beunang dipake dina seni sora jeung seni sastra.

Dina ieu bagian, nerangkeun bab sisindiran teh arek tina jihat seni sastra. Anu patali jeung seni sora mah (kawihna jeung laguna) leuwih merenah lamun diterangkeun husus dina bab seni eta.

Sanajan sindir jeung sisindiran tea ceuk hartining kecap mah beda-beda hartina jeung larapna, tapi ari pokona mah tetep sarua, nyaeta ngedalkeun maksud henteu saceplakna, tapi dibulen ku kecap-kecap sejen anu ngandung karasmen, dipalar pikaresepeun. Lamun diibaratkeun kana bubuahan tea mah, aya cangkang jeung eusina. Bisana kaarah eusina the kudu bisa mesek cangkangna tea. Malah tampolana mah eusi teh dibulen ku dua pesekeun, cara misalna kalapa atawa muncang. Geus beunang tapasna atawa kopakna teh, kudu bisa ngalaan batokna deuih, kakara kaarah eusina.

Lantaran ngarah karasmen atawa pikaresepeun tea, sipatna oge teu jauh teu jauh ti dinya, aya anu “silih asih”, “piwuruk” jeung “kaheureuyan” atawa anu istilahna disebut “sesebred” tea.

Sisindiran teh lain husus kabinangkitan Sunda, tapi kum di sakuliah Indonesia, ngan beda-beda nyebutna. Di Sunda disebutna “sisindiran”. Di Jawa “parikan”, di Malayu “Pantun”, di Tapanuli “ende”, jeung jaba ti eta, sabasana-sabasana. Iketanana atawa banguna oge eta-eta keneh, silih asih, piwuruk jeung kaheureuyan.

Baheula pisan, samemeh jalma-jalma carapetang jeung motekar cara kiwari, sindir atawa sisindiran teh mangrupa perlambang, silokana atawa sasmita ku barang-barang. Boh dangdaunan atawa kekembangan, boh gambar (lambang atawa wawaton), boh barang-barang lianna aya anu bungkeuleukan, malah sasatoan oge henteu diiwalkeun. Tegesna kabeh oge mangrupa tanda sandi (code) anu masing-masing boga harti.

Rupaning dangdaunan atawa tatangkalan, upamana bae di urang di nu nagruat make sok aya jukut palias, geusan mangpaliaskeun saniskara pancabaya. Di nu kawinan make mayang kembar, sasmita masangna panganten awewe jeung lalaki nu paayang-ayang. Di nu dibuat sok ngaheulakeun ngetem pare sawatara ranggeuy, siloka Nyi Dewi Sri (Ibu Pare). Jeung jaba ti eta.

Rupaning gambar, upamana panyinglar jurig, upih diculat-calet ku apu. Tapak suku dina batu. Pamor dina kujang. Jejelemaan dina landean keris (upamana bae “mantri kabendon”, “satria pinayungan”, “tunggak semi”), gambar dina bandera, kitu deui warnana. Ukiran-ukiran jeung songketan-songketan katut rupa-rupa poleng jeung rea-rea deui.

Rupaning barang, upamana bae dinu kawinan, panganten sok ngalengkahan pakara. Di nu hayang boga anak awewe sok tutukeuran sinduk ( hayang lalaki sok tutukeuran mutu). Di nu turun sapa, sok ngawurkeun lebu, nyicikeun cai, ngagurat taneuh jeung jaba ti eta.

Rupaning sasatoan, upamana bae dinu sunatan sok make “bela” ku mencit hayam. Di nu nagdegkeun wangunan rohaka sok ngaruang hulu munding. Sarta rupa-rupa deui.

Eta kabeh diarah sindirna. Nepika ayeuna oge di ditu didieu sok aya keneh nu makekeun.

Bareng jeung mekarna pangabisa jalma, bari nungtutan laleungitanana sindir atawa sasmita anu ngajirim tea, lila-lila (duka sabada sabaraha ratus taun), nya timbulsindir anu ngan mangrupa ucap wungkul, rek meh siga tatarucingan, pesekeun anu surti.

Tah eta sindir eta, disarebut weh “sisindiran”.

Jadi lamun digiligkeun, dijieun wangenana, anu disebut “sisindiran” teh nyaeta: kasenian ngareka basa anu diwangun ku cangkang jeung eusi, pikeun ngedalkeun maksud anu henteu saceplakna bari dipambrih karesmianana. 

Bangun jeung Sipat

Anu disebut bangun teh nyaeta pasang peta iketanana atawa rakitanana. Ieu teh babakuna aya tilu bangun, nyaeta:1. Wawangsalan; 2. Rarakitan; 3. Paparikan.

Dina jero bangun anu tilu rupa tea, lamun ditilik sipatna, masing-masing ngabogaan tilu rupa sipat, 1. Silih asih; 2. Piwuruk; c. sesebred.

Tegesna, sisindiran teh direkana atawa dianggitna mah bisa jadi mangrupa wawangsalan, bisa jadi mangrupa rarakitan, bisa jadi mangrupa paparikan. Ari sipatna anu mana-mana oge bisa jadi silih asih, bisa jadi piwuruk, bisa jadi sesebred.

Supaya leuwih tetela. Ari disebutna mah sakabehna oge eta teh dikumkeun sisindiran, ngan banguna rupa-rupa, aya wawangsalan, rarakitan jeung paparikan tur masing-masing bisa ngabogaan sipat silih asih, piwuruk jeung sesebred.

1. Wawangsalan

Ceuk sawareh pangna disebut wawangsalan teh dumeh asal tina kecap wangsal anu lila-lila jadi wangsul, hartina balik. Eta sababna cenah, anu matak diurang Sunda oge aya kecap bangbalikan, saharti jeung wawangsalan tea.

Cek sawareh deui asal tina angsal, anu hartina beunang, sabab dina wawangsalan teh aya sabangsa teteguhan anu kudu dibeunangkeun eusina.

Tapi, boh wangsal boh angsal ari asalna pisan mah, anu tetela bae dina basa Sunda aya istilah anu prah disarebut wawangsalan, nyaeta salah sahiji ti antara bangun sisindiran. Wawangsalan aya dua rupa nyaeta:

a. Bangbalikan-lanjaran

b, Bangbalikan danding

a. Bangbalikan-lanjaran

Anu disebut bangbalikan teh nyaeta sabangsa wawangsalan anu diwangun ku cangkang jeung eusi, sarta disatukangeun (sabalikeun) eusina tea aya kecap anu kudu diteangan hartina.

Sababna anu matak disebut lanjaran (lain lancaran), dumeh biasana “disualkeunana” sok ngalagar salanjar bae, tara dituluykeun jeung eusina. Rajeun jeung eusina, diucapkeunana sok saengapankeun.

Ari anu disebut cangkang, nyaeta “sualanana”. Dina hokum sisindiran cangkang teh sok diucapkeun ti heula, tuluy dieusian ti pandeuri. Biasana cangkang teh henteu aya patalina jeung sipat sisindiran, hartina teu aya patalina jeung maksud anu ditujuna. Eta mah ngan pangresmi bae.

Ieu conto bangbalikan lanjaran anu geus ngalemah jadi jadi paribasa:
Teu puguh monyet hideungna.
Aya ka kelor hejona.
Geus jadi sabiwir hiji.
Teu beunang disupa dulang.
Deukeut-deukeut anak taleus.

Eta kabeh geus tara atawa arang pisan bari disebut jeung eusina, sumawona make jeung dipesek mah. Padahal lamun kudu disalanjarankeun jeung eusina, kudu kieu


Teu puguh monyet hideungna, asa teu puguh tungtungn
Aya ka kelor hejona, sok matak pikaseurieun
 Geus jadi sabiwir hiji, jadi pangaleman jalma
Teu beunang disupa dulang, teu beunang dibebenjokeun
 Deukeut-deukeut anak taleus, nyangkewok teu kanyahoan.

Ayeuna kari neangan harti kecap anu satukangeun (sabalikeun) eusina tea. Kieu:Anu diteguhkeun monyet hideung. Dina eusi, aya kecap tungtungna.
Jadi maksudna teh lutung.Kelor anu rupana hejo atawa bangsana kelor tapi dauna hejo kolot. 
Euh atuh turi, ceuk kecap  pikaseurieun.
Biwir dua dirapetkeun jadi hiji, ngarana balem. Bukti dina kecap pangaleman.
Dulang aya supaan?piraku? Meureun anu dipapandekeun kana supa. kejo! Da enya ceuk kecap dibebenjokeun.
Anak taleus ngarana tewok (cara anak awi ngarana iwung).
Ieu dibejakeun ku kecap nyangkewok.

Jadi ayeuna tetela, yen neangan eusi tatarucingan teh kudu dina salah sahiji engang, bisa jadi engang di hareup, bisa jadi di tengah, bisa jadi di tukang.

Dina kasusastraan, bangun prosa, hartina dina basa lancaran, eta bangbalikan lanjaran teh sok sering diselapkeun dina kalimah-kalimah anu biasa, dijieun panyari. Ieu contona.

Memed pohara atoheunana, dumeh geus kauntun tipung katambang beas, laksana meunang ijajah. Manehna geuwat nyueatan ka kolotna.

Saderek sesepuh, sakitu pihatur kuring, katuncar paranjang gagang, masang tabe rek mungkurkeun.


Nyaba ka Cianjur teh piring jadi dulang leah, kuring mah tinggaleun kari waasna.

Tampolana ari kecap-kecap laksana (1), masang tabe (2) jeung tinggaleun kari waasna (3), Geus tara disebut-sebut deui, anggeus ku cangkangna bae.

Conto-conto sejen anu asup kana bangbalikan lanjaran tur pohara basajana jeung sok diselapkeun dina prosa:

“ngembang kadu, ngembang boled, kapiring leutik, dirangkong kolong, ngajampana bugang, bale nyungcung, dianjing cai, jawadah tutung biritna, djrrd.”

b. bangbalikan-dangding

Wawangsalan model bangbalikan dangding, nyaeta dangding anu unggal-unggal pada direka cangkang eusi bangbalikan tea.

Biasana pupuh anu diparake pikeun bangbalikan teh ngan pupuh gede atawa sekar ageng bae, nya eta Kinanti, Sinom, Asmarandana, Dangdanggula.

Dina pupuh Kinanti, kulantaran ungkarana jangkep (aya genep) sapada-sapada teh bisa diatur tilu cangkang, tilu eusi diheuleut-heuleut.

Dangdanggula, ari jumlah ungkarana mah jangkep (aya sapuluh), tapi lantaran anggaresol, henteu cara Kinanti anu unggal ungkarana diwangun ku 8 engang, dina Dangdanggula mah kapaksa aya anu direka cangkang wungkul, atawa eusi wungkul. Sakapeung, cangkangna dua ungkara ari eusina ngan suangkara.

Dina Asmarandana, anu jumlah ungkarana tujuh jeung sinom salapan, cangkang jeung eusi teh cara dina Dangdanggula teu bisa angger mulus marelena. Teu cara dina Kinanti.

Sipat bangbalikan dangding, babakuna silih asih jeung sakapeung sok aya piwuruk. Meh tara manggih anu direka sesebred mah.

Conto bangbalikan dangding:

1. Kinanti:

Di Cikajang aya gunung, asa paturay jasmani, kalong leutik saba gedang, bawaning sumedot piker, kembang biru di astana, abot pisan jeung nu asih.

2. Sinom:

Balandongan ngujur jalan, sok hayang los bae indit, kendang gede pakauman, dagdigdug rasaning ati bade direka masjid, mun emut bati rumanjug, tegal tengah nagara, laun-laun sugan hasil, kadal gede pareng alus bagja awak.

3. Asmarandana

Simpay rema beulit cinggir, ulah lali mun geus angkat, mugi emut saban waktos, pangcalikan tonggong kuda, kanu tuhu bumela; ulah matak gender kayu, matak bingbang pipikiran,

4. Dangdanggula

Pare leuweung saha nu teu peurih, tawon hideung asa disangsara, hampas minyak dibobodo, hanas abdi satuhu, nanging agan tuang janari, teu puguh kasauran, sok gedang malayu, jalir tur cidra subaya, beubeur cangkeng balung kabulen ku daging, buktina luncat-mulang.

2. Rarakitan

Rakit, ari nu dina cai mah buktina sababaraha leunjeur awi atawa kai  diatur dibereskeun, tuluy dipageuhan, boh ku tali boh ku paseuk, ditirukan puhuna sina ngaberes jajaranana, papak rata henteu anggaresol. Jabana ti kitu the dipilih sabisa-bisa anu sarua gedena. Ngan ka congona henteu papak rata the.

Jadi kaharti upama istilah “ngarakit” rek henteu pajauh hartina tina nyieun rakit, nyaeta ngatur atawa ngabeberes malar hade marelena, alus ujuranana, ngareunah jajaranana, henteu pasolengkrah matak sareukseuk nenjona.

Ari panyebut “rarakitan”, dina hokum sisindiran, nyaeta kawih anu cangkang jeung eusina sarua, papak rata dipuhuna.

Buktina, sakecap atawa dua kecap dina puhu cangakangna, sok dibalikan deui eusina, nepika jiga sapasang (ngarakit, masang).

Tegesna mah, dina rarakitan mah puhu cangkang teh dipindo atawa dibalikan deui dina eusina. Malah sakapeung mah dimamanis ku larasmadya. Saterusna, sada jeung sora sok padeukeut.Contona:

Sapanjang jalan Soreang,

moal weleh diaspalan,

sapanjang tacan kasorang,

moal weleh diakalan. 

Mihape sisir jeung minyak,

kade kaancloman leungeun,

mihape piker jeung niat,

kade kaangsonan deungeun.

Ka mana nya nyiar kulit,

hayang seubeuh sesewiran,

ka mana nya nyiar duit,

hayang seubeuh pelesiran.

Lain bangban lain pacing,

lain Kananga kuduna,

lain babad lain tanding,

lain kadinya kuduna.

Eta conto-conto diluhur sipatna silih asih.

Conto dina piwuruk:

Lamun urang ninun kanteh,

ulah resep make poleng,

lamun urang leutik keneh,

ulah resep ngomong goreng,

Meugeus diangir ku jengjing,

geura ganti ku kihiyang,

meugeus pelesir ti peuting,

geura ganti ku sambeang

Sing getol nginum jajamu,

nu guna nguatkeun urat,

sing getol neangan elmu,

nu guna dunya aherat. 

Anu sipatna sesebred, upamana bae:

Rarasaan melak cau,

teu nyaho mun melak cabe,

rarasaan matak lucu,

 teu nyaho mun matak rehe.

Majar maneh cengkeh koneng,

kulit peuteuy dina nyiru,

majar maneh lengkeh koneng,

kulit beuteung mani nambru.

3. Paparikan

a. Paparikan Kawih

asalna tina “parik”, anu sumberna tina “parek”, hartina deukeut

Teu kudu heran tina “parek” jadi “parik”, sabab dina elmu basa mah hukum robahna sora teh geus kaprah.Rea kecap anu sorana jadi robah tapi hartina eta-eta keneh, upamana bae dina hukum basa lemes atawa basa dialek.Sakapeung robah sora bari ngeser hartina tapi hakekaktna eta-eta keneh. Contona:

tilik..................................................jadi telek

takir………………………………………jadi taker

nitis……………………………………….jadi netes

rakit.................................................jadi raket

racik................................................jadi racek

angkiran.........................................jadi angkeran

pinaring..........................................jadi pinareng

ngahening......................................jadi ngaheneng

sirih.................................................jadi seureuh

galih................................................jadi galeuh

sangkir...........................................jadi sengker

pa(h)it...........................................jadi paheut.

Jadi paparikan atawa paparekan teh maksudna mah “deudeukeutan”. dina hukum sisindiran, anu padeukeut teh nyaeta sada atawa sora dina cangkang jeung eusi kawih, malah sakapeung mah sok sarua pisan. 

Conto-contona paparikan anu sipatna silih asih, upamana bae:

Leuleupeutan leuleumeungan,

ngarah kekejoanana,

Deudeukeutran reureujeungan,

ngarah tetenjoanana.

Baju soeh tatambalan,

kaput gede jarumatna,

Daek soteh ngawulaan,

lamun hade rumawatna.

Pucuk tiwu akar bangbang,

amismata disusukan,

Mun rek milu geura dangdang,

cimata geura susutan.

Ari conto-conto nu sipatna piwuruk, upamana bae,

Ka kulon nyair kapiting,

ngocok lobak bobodasna,

ulah sok liar ti peuting,

osok loba gogodana.

Susuru opat ngajajar,

katinggang ku daun jati,

Guguru kapalang ajar,

cara kembang burung jadi.

Anu sipatna sesebred, contona:
Poe saptu poe kemis,

salasa heuleut-heuleutan,

Saha itu gede kumis,

leumpangna eundeuk-eundeukan.


 Cikur jangkung jahe koneng,
Lampuyang pamura beuteung,
Rarasaan jangkung koneng,
puguh mah bureuteu hideung.


Daun jarak dibeungkeutan,
dibawa ka jalan gede,
Anu harak ngadeukeutan,
hayangeun dibawa hade.

Rarakitan jeung paparikan, henteu salawasna 4 padalisan. Rajeun aya oge anu genep ungkara, malah aya anu nepika dalapan, sapuluh nepika genep belas ungkara. 

b. Paparikan Dangding

Dina hukum kasusastraan jeung seni sora, anu disebut paparikan teh nyaeta sarupa sisindiran anu sora atawa sada-sada dina eusina deukeut kana sora jeung sada dina cangkangna.

Paparikan dangding the diwangun ku dua pada. Anu sapada ti heula cangkangna, ari nu pandeuri eusina.

Cara dina bangbalikan danding wae, pupuh anu biasa dipake teh ngan pupuh galede anu opat. Kitu deui sipatna, najan ceuk teori mah henteu aya halangananadijieun sesebred, ari kabiasaan praktekna mah ngan sok diparake dina silih asih jeung sakapeung dina piwuruk.

Ieu kabinangkitan paparikan dangding, cara saumumna bab ngadangding bae. Lain asli kabinangkitan Sunda, tapi asal ti Mataram. Asupna ka Sunda, kira-kira saheulaeun atawa sapandeurieun seni batik, seni wayang jeung basa lemes dina jaman Mataram nanjung.

Di Sunda pribadi paparikan (jeung sisindiran liana) teh mangrupa kawih anu unggal-unggal padalisan diwangun ku dalapan engang.

Conto-conto paparikan dangding, upamana bae:

Kinanti

Ngalantung mulungan tanjung, bari metik nagasari, kembang goyang jeung ermawar, pacampur jeung kacapiring, seungit kembang sumarsana, bawa angin ngadalingding.

Baringung pikir mangmaung, ati ngerik jeung rarisi hariwang rea ka kelar, tagiwur teu ngeunah cicing nu laip kieu rasana, nandang nyeri tanpa tanding.

Carulang dipahpal kuda, hejo deui hejo deui, sayang kaak diarengan, diasupkeun kana peti, tanjakan awi tali, Rayagung tanggal sapuluh, kasungka jeung malela, ngala antanan ka jami, tangkal jeuruk cau emas tengah huma.

Rek mulang samar kaduga, nenjo deui, nenjo deui, hayang angkt sasarengan, bati gegetun nya ati, hoream bilih lali, abdi burung mun teu tulus, kasuka ti baheula kahayang ulah rek lami, lamun rujuk abdi unjukan ka ama.

Asmarandana

Kapinis ulah disumpit, tangkal muncang ngarangrangan, kembang kopi kembang kopo, karungkang pucuk karungkang, lampuyang cocongoan, bawaeun ka Rajagaluh, batu tulis di sakola.Ieu nulis bade pamit, doakeun ti kaangangan, ulah lali ulah poho, karuhun masing karuhan, ku hayang sosonoan, isuk mah urang pajauh, cing hayang papanggih heula.


Dangdanggula

Tangkal manjah neba sisi lamping, tangkal putat rubuh kaibunan, handapeun parungpung kosong, katuncar cikur nahun, dicician dijieun kopi, dipais tru disemat, kubang sisi sumur, kahieuman tangkal dadap, kembang wangi dirajangan sapadati, mun tangkil jeung dauna.

Hate bungah anu taya tanding, nampi serat sinareng kintunan, piker bingung jadi longsong, abdi the hatur nuhun, kaweningan estu katampi, baris didamel jimat, saimbang jeung umur, teu diteundeun handap-handap, siang wengi baris ngarencangan abdi, wawakil nu ngituna.

Eta kabeh conto anu sapada cangkangna, sapada deui eusina. Tapi sok aya anu nya cangkang nya eusi dina pada eta-eta keneh. Upamana bae dina pupuh sinom:

“Baju hideung kancing tangan, dikaput ku merang awi, nu hideung matak teunangan, sing emut ka diri abdi, ka mana mun ka cai, ka handapeun kai sempur, sempur nu ngarangrangan, ka mana nya “Nyebut” nyai kanu hideung sampulur aya karangan”.

Sesebred

Sesebred, kecap nu make “dwipurwa”, cara kecap-kecap, sesengked, cecempeh, pepentol, cucutik, dadampar, popongkol, jeung jaba ti eta.

Lamun nurutkeun rasa basa jeung sada sora, bisa dikira-kira yen sesebred the boga harti: surung, gusur, sigeung, senggol. Geura ieu kecap, rarasakeun:

Sered………………………….sebred

Serot………………………….sebrot

Gerus…………………………gebrus

Iring…………………………..abring

Kecap-kecap anu ditataan pandeuri (diselapan aksara b), bari robah harti teh, robah oge rasana, asa leuwih rosa.

Jaba ti eta, lamun urang nengetan kecap-kecap anu tungtungna “red” atawa “ed” bari dirarasakeun, eta kecap-kecap teh henteu kaasup anu alus wandana. Contona, jebred, sered, palered, bered, bared,joged, renced jeung rea-rea deui.

Lamun dipapay ka lebah dinya, teu bisa jadi lamun bangbalikan disebut “sesebred” teh. Mangkaning apan ari bangbalikan mah sok pohara halona. Geura ieu contona.

1.     Beulit cingir simpay rema, dilali-lali teu lali.

2.     Samak menak munding beulang, gamparan sok nyapirakeun.

3.     Imah ngambang sisi laut, ngapalkeun sing getol tigin, beling bunder kaulinan, ulah pisan lanca-linci, tangkal nu merang dauna, mun teu lulus matak sedih.

Beda deui jeung nu “amis kesed”, peureus tapi matak resep. Upamanam

majar maneh cengkeh koneng,

kulit peuteuy dina nyiru,

Majar maneh lengkeh koneng,

Kulit beuteung mani nambru.

 Jauh-jauh manggul awi.

uyuhan teuing teu merang,

Jaung-jauh nyusul kami,

uyuhan teuing teu wiring

Cau raja turun jantung,

saturuy jadi sasikat,

Taya bagja taya untung,

 ngan ukur ngajadi sobat,

Jadi cindekna, sesebred teh, sisindiran mangrupa kawih kaheureuyan anu ocon. Da eta, dina buktina oge jalma nu sesebred teh ngarasa ari celetetna sindir kana hate mah, tapi henteu bisa ambek, da kahalangan ku karesmian.

(Dicutat tina Kandaga; M.A. Salmun)

Salajengna Juragan