Jiwa Bedas

Piit ngabubuhan ricit

jogjog ngagonjok sok cekcok

tapi garuda ngalayang

nyorangan di awang-awang

taya karisi karingrang

Lain hirup ku diawur

lain gede ku pamere

teu rek sirik ka galatik

teu rek ngewa ka kadanca

sanggup ngapak ku jangjangnaeu kagembang 

Teu kaduyung kunu hurung

teu kagembang kunu herang

teu ngundeur ka kebon deungeun

teu mambrih sugih ku duit

mun hasil panggawe rujit.

(Quint; Kandaga III)

Salajengna Juragan

Ulah Senang Dina Haram

Mun teu nyiar moal dahar

mun teu ngarah moal ngarih

mun teu ngakal moal ngakeul

mun teu ngopek moal nyapek

Nu teu bageur moal cageur

nu teu tulus moal mulus

nu teu bener moal beuneur

nu teu beresih moal asih

Ulah beunghar teu makaya

ulah ginding beunang maling

ulah jegud ku gerejud

eta mah kasakit jagat,

Pahing jangji tanpa bukti

pahing seubeuh ku macikeuh

pahing senang ladang haram

yakin yen moal jamuga

(Quatrain; Majalah Sunda)

Salajengna Juragan

Payuneun Rabuljalal

Balitungan sabada kiamat
dosa jasa sakabehna umat.


Lebah dinya teu aya cacah teu aya menak
unggal arwah teu deungeun teu sanak.


Sabab mungguh Rabuljalal
nimbangna teh ku salehna amal.


Najan raja mun dolim tur murka
loba dosa tangtu ka naraka.


Tapi cacah lamun saleh mu'min
dipiasih ku Rabul-Alamin.


Harta banda pangarti mubadir,
taya pedah di yaumil-ahir.


(Distichon; Kandaga III)

Salajengna Juragan

Tap Akur

Sabada salat

tuluy munajat

kalawan to'at

Di kamar leutik

diliung bilik

keur anteng calik

Di tempat suci

tapakur muji

mantep ka Gusti

neda hidayah

miceun kasusah

nu patulayah

Di dunya kusut

pakutcrut ribut

ku nu parebut

(tina Kandaga III)

Salajengna Juragan

Sunda Ngahiji

Muga sing mulus

muga sing banglus

nembongkeun daya

anaking sing panjang-punjung

aranjeun sing nanjeur nanjung

makayakeun urang Sunda

nyabak hanca nu Katunda

Kolot mihape

rame ing gawe

ka hareup jeuhjeuh

ka tukang meujeuh

jadi hulu mangka nyanggut

mangka ngepot lamun buntut

ciri wanci ati hurip

cadu ngandung jawi laip

(Majalah Sunda)

Salajengna Juragan

Leuwi Budaya Sunda

Sampurasun, giring aub
neda  cikaracak ka-Sundaan
sugan teu tuhur ku katiga
henteu keri ku gogoda


golontorkeun cai rasa
kana wahangan seni
anu wening sarta suci


kokojayan bari teuteuleuman
dina leuwi kabudayan
silih simbeuh silih cebor
ku kabinangkitan


lebar temen mun sastra Sunda teu mekar
tangkal budaya ngarangrarangan
jadi ciri
kurang pangraksa
ti para mitra
Putra Sunda




(Kandaga)

Salajengna Juragan

Bingbang

Sumber poto:http://multiply.com/mu/membukamata

Ku Dian Hendrayana

Sok tumaros saban neuteup langit

naha bentang nu ngampar baranang

cicingna didinya bae

tara patukeur matuh

sumawonna pahili calik

narah pagirang-girang

teu paluhur-luhur

bet angin heman ngiberan

maneuh soteh puguh bentang nuju wirid

anteng nyambat Pangeran

Sok tumaros saban neuteup langit

naha bulan satia nembongan

bangun nu taya kacape

kumaha lamun pundung

bulan indit teu deui balik

bentang taya baturna

ngabigeu ngawagu

angin heman ngabejaan

puguh bulan satia moal rek jalir

gumusti ka Pangeran

Sok tumaros saban neuteup langit

mangsa beurang alam teh gumantung

kacaangan panonpoe

pareng mangsana surup

cahya ngempray ngampih ka mendi

inggis teu deui datang

lunta dumeh pundung

pok angin halon ngiberan

moal enya nu dikir indit lumungsir

ngolembar ti Pangeran

Saban pareng anteng neuteup langit

tingkalayang kalangkang sorangan

ngoleab pating koloyong

geuning diri kapahung

rampang reumpeung kamana ngeumbing

taya akar keur muntang

ngoleang ngalayung

da puguh diri keur bingbang

gupay gupay, Pangeran taya kasungsi

duka aya di mana

Wanayasa, 2005
Cupumanik No. 29/2005

Salajengna Juragan

Doa

Sumber poto: huzaifah-iphenk.blogspot.com

Dina jempling sepi peuting
ayat-ayat Alloh dihiberkeun
dileupaskeun tina jaruji iblis
mangsa diri eling

Ya Alloh

kakiatan nu dipiharep

pikeun meruhkeun katelengesan

jaman nu beuki ngabarungsinang

memeh diri tepung jeung udagan

Peuting beuki jempling

doa-doa geus diburakeun

laju ngalayang ngambah jomantara

sugan anjog ka sidrotul muntaha

Cihayam, 1997

Mangle No. 1678/1998

Nyutat tina Gentra Basa Sunda; Drs. Dingding Haerudin, M.Pd

Salajengna Juragan